بھونیشور:18 /اپریل(ایس اونیوز /آئی این ایس انڈیا) وزیر اعظم نریندر مودی کے ہیلی کاپٹر کی مبینہ تحقیقات کو لے کر الیکشن کمیشن کی طرف سے ایک آئی اے ایس افسر کو معطل کئے جانے کے بعد اب ایک ویڈیو سوشل میڈیا پر وائرل ہوا ہے، جس میں مرکزی وزیر دھرمیندر پردھان اپنے ہیلی کاپٹر کی جانچ کے دوران آپا کھوتے نظر آ رہے ہیں۔ ویڈیو میں دھرمیندر پردھان کے منگل کو اڑیسہ کے سمبل پور پہنچنے پر ان کے ہیلی کاپٹر کی تفتیش کے لئے آئے فلائنگ اسکواڈ اور پولیس کے ساتھ ان کہا سنی کرتے دیکھا جا رہا ہے۔ دھرمیندر پردھان مودی کی جلسے میں شامل ہونے والے تھے۔ویڈیو میں دیکھا گیا کہ وزیر تفتیشی ٹیم سے کاغذات مانگ رہے تھے۔ اگرچہ بی جے پی ذرائع نے بعد میں کہا کہ واقعہ کے بعد فلائنگ سکواڈ نے آخر کار جانچ نہیں کی۔ سوشل میڈیا پر ایسے ہی ویڈیو کے ایک سیٹ سے اس واقعہ کا ملاپ کیا گیا ہے، جس میں اسی دن راورکیلامیں فلائنگ اسکواڈ کو بیجو جنتا دل (بی جے ڈی) سربراہ اور اڑیسہ کے وزیر اعلی نوین پٹنائک کے ہیلی کاپٹر کی تفتیش کرتے دکھایا گیا ہے۔ ویڈیو میں پٹنائک کو تفتیش میں مکمل تعاون کرتے دیکھا گیا ہے اور وہ تفتیش مکمل ہونے تک ہیلی کاپٹر میں انتظار کرتے رہے۔ پٹنائک ایک روڈشو کے لئے ر اورکیلا میں تھے۔ سمبل پور میں وزیر اعظم کے ہیلی کاپٹر کی مبینہ تفتیش کے لئے الیکشن کمیشن نے عام سپروائزر محمد محسن کو تمام ذمہ داریوں سے معطل کر دیا۔آئی اے ایس کے کرناٹک کیڈر کے افسر محسن کو اسپیشل پروٹیکشن گروپ کی حفاظت والوں کے سلسلے میں کمیشن کی ہدایات کے خلاف کام کرنے کے لئے معطل کر دیا گیا۔ اس دوران بی جے ڈی انتخابی امور کے دوران سرکاری حکام کے ساتھ برے سلوک کے لئے مرکزی وزیر کے خلاف کارروائی کا مطالبہ کرتے ہوئے چیف الیکشن آفیسر (سی ای او) کے پاس گیا ہے۔ کانگریس اور عام آدمی پارٹی نے اس کو لے کر نشانہ لگایا ہے۔ کانگریس نے ٹویٹ کرتے ہوئے کہا ہے کہ ایک افسر کو گاڑیوں کی جانچنے پر الیکشن کمیشن نے معطل کر دیا۔ اس میں تشہیر کے لئے سرکاری گاڑیوں کے استعمال کے قوانین کا حوالہ دیا گیا ہے۔ اس اصول کے تحت وزیر اعظم کی گاڑی کو تلاشی سے کوئی رعایت نہیں ہے۔ مودی اپنے ہیلی کاپٹر میں کیا لے کر چلتے ہیں کہ وہ بھارت کو نہیں دکھانے چاہتے۔وہیں عام آدمی پارٹی نے ٹوئٹ کرتے ہوئے نشانہ لگایا ہے کہ پی ایم مودی کے ہیلی کاپٹر کی تلاشی لینے والے افسر کی معطلی۔ چوکیدار اپنے ہی محفوظ گھیرے میں رہتے ہیں۔ کیا چوکیدار کچھ چھپانے کی کوشش کر رہے ہیں۔